काठमाडौं, असार २५, २०८३। नेपाल घरेलु तथा साना उद्योग महासंघको २६औँ राष्ट्रिय महाधिवेशनबाट श्रीमती शोभा गुरुङ अध्यक्षमा निर्वाचित हुनुभएको छ। त्यसैगरी केन्द्रीय महिला उद्यमी समितिको २३औँ राष्ट्रिय महिला उद्यमी सम्मेलनबाट श्रीमती रीता अवाल अध्यक्षमा निर्वाचित हुनुभएको महासंघले जनाएको छ।

महासंघले माइतीघरस्थित केन्द्रीय कार्यालयमा आयोजित पत्रकार सम्मेलनमार्फत नवनिर्वाचित केन्द्रीय कार्यसमिति तथा महिला उद्यमी समितिको औपचारिक घोषणा गरेको हो। महासंघका अनुसार महाधिवेशन गत असार २१ र २२ गते नेपाल प्रशासनिक प्रशिक्षण प्रतिष्ठान, ललितपुरमा सम्पन्न भएको थियो।

नवनिर्वाचित केन्द्रीय कार्यसमिति

महासंघको वरिष्ठ उपाध्यक्षमा डम्बर प्रसाद रेग्मी निर्वाचित हुनुभएको छ। उपाध्यक्षहरूमा पूर्ण बहादुर भण्डारी (लघु उद्यम), सत्य नारायण अग्रवाल (घरेलु उद्योग), यादव कुमार अधिकारी (साना उद्योग), हरीहर थापा (अन्तर्राष्ट्रिय सम्बन्ध), जानकी प्रधान (महिला), मोहन कटुवाल (वस्तुगत), रामनाथ मैनाली (एसोसिएट), सत्य नारायण प्रजापती (सहकारी), चन्द्रबहादुर बुढा क्षेत्री (कृषि) तथा गुणराज ढकाल (नविकरणीय ऊर्जा) निर्वाचित हुनुभएको छ।

त्यसैगरी विनोद देव पन्त महासचिव, बिरेन्द्र जती कोषाध्यक्ष, प्रेमबहादुर डी.सी. सचिव तथा हेम विक्रम जी.सी. सहकोषाध्यक्षमा निर्वाचित हुनुभएको छ।

केन्द्रीय महिला उद्यमी समितिको नेतृत्व

महिला उद्यमी समितिको अध्यक्षमा रीता अवाल, वरिष्ठ उपाध्यक्षमा शान्ति शर्मा, उपाध्यक्षहरूमा शर्मिला खत्री (उद्यम व्यवसाय) र सोनी महतो (संगठन) निर्वाचित हुनुभएको छ।

त्यसैगरी सुलोचना श्रेष्ठ महासचिव, मिना तामाङ कोषाध्यक्ष तथा दिपा शाक्य सचिवमा निर्वाचित हुनुभएको छ।

अर्थतन्त्रमा लघु तथा साना उद्योगको महत्वपूर्ण योगदान

पत्रकार सम्मेलनमा महासंघले प्रस्तुत गरेको तथ्यांकअनुसार नेपालमा हालसम्म ६ लाख ४८ हजार ५७७ लघु, घरेलु तथा साना उद्योग दर्ता भएका छन्, जसमध्ये करिब ५० प्रतिशत उद्योग सञ्चालनमा रहेका छन्।

देशमा सञ्चालित उद्योगमध्ये ९५ प्रतिशतभन्दा बढी उद्योग लघु, घरेलु तथा साना उद्योग रहेका छन्। यस क्षेत्रले प्रत्यक्ष रूपमा कुल गार्हस्थ उत्पादन (GDP) मा करिब ६ प्रतिशत योगदान पुर्‍याइरहेको छ भने अनौपचारिक क्षेत्रमा संलग्न करिब ५ लाख परिवारलाई समेत समेट्दा कुल योगदान झण्डै १३ प्रतिशत पुग्ने महासंघको दाबी छ।

महासंघका अनुसार यस क्षेत्रले झण्डै ३५ लाख जनशक्तिलाई रोजगारी प्रदान गरिरहेको छ भने नेपालको निर्यात व्यापारको आधाभन्दा बढी हिस्सा पनि यही क्षेत्रबाट योगदान भइरहेको छ।

उद्योगमैत्री नीति आवश्यक

नवनिर्वाचित अध्यक्ष शोभा गुरुङले कोभिड–१९ महामारीपछि उत्पादनमूलक उद्योग व्यवसाय अझै पूर्ण रूपमा पुनरुत्थान हुन नसकेको उल्लेख गर्दै सरकारबाट प्रभावकारी राहत, सहुलियत तथा उद्योगमैत्री नीति आवश्यक रहेको बताउनुभयो।

उहाँले स्टार्टअप उद्यम प्रवर्द्धन, युवा उद्यमशीलता विकास, लगानीमैत्री वातावरण निर्माण, नीति तथा कानुनी सुधार, स्थानीय कच्चापदार्थको उपयोग तथा निर्यात प्रवर्द्धनमा सरकार र निजी क्षेत्रबीच सहकार्य अपरिहार्य रहेको धारणा व्यक्त गर्नुभयो।

देशभर महासंघको सशक्त सञ्जाल

महासंघका अनुसार हाल देशभर ३५० भन्दा बढी पालिका संघ, ७७ जिल्ला संघ र ७ प्रदेश संघ सक्रिय छन्। साथै ५० हजारभन्दा बढी उद्यमी प्रत्यक्ष सदस्य तथा करिब १५ हजार महिला उद्यमी महासंघको सञ्जालमा आबद्ध रहेका छन्।

महासंघअन्तर्गत २७ वटा वस्तुगत संघ, एसोसिएट सदस्य, उत्पादनमूलक सहकारी तथा वैकल्पिक ऊर्जा क्षेत्रका हजारौँ व्यवसायी प्रत्यक्ष तथा अप्रत्यक्ष रूपमा आबद्ध रहेको जानकारी पनि पत्रकार सम्मेलनमा दिइयो।

उद्योग विकासमा सहकार्यको प्रतिबद्धता

नवनिर्वाचित कार्यसमितिले आगामी कार्यकालमा संस्थागत क्षमता अभिवृद्धि, उद्योगमैत्री नीति निर्माण, महिला उद्यमशीलता प्रवर्द्धन, स्थानीय उत्पादनको बजारीकरण, रोजगारी सिर्जना तथा आत्मनिर्भर अर्थतन्त्र निर्माणका लागि सरकारसँग सहकार्य गर्दै अघि बढ्ने प्रतिबद्धता व्यक्त गरेको छ।

महासंघले लघु, घरेलु तथा साना उद्योग नेपालको आर्थिक समृद्धि, रोजगारी सिर्जना तथा निर्यात वृद्धिको प्रमुख आधार भएकाले यस क्षेत्रका मुद्दालाई प्राथमिकताका साथ राष्ट्रिय बहसमा ल्याउन सञ्चारमाध्यमहरूको सक्रिय सहयोगको अपेक्षा समेत गरेको छ।